కృష్ణా జిల్లాలో దారుణం: బాలుడి హత్య, నానమ్మ పరిస్థితి విషమం

దుండగుల దాడిలో పదేళ్ల బాలుడు మృతి చెందగా, నానమ్మ తీవ్ర గాయాలపాలైన విషాదకర ఘటన కృష్ణాజిల్లా నందివాడ మండలం పెదలింగాల గ్రామంలో జరిగింది. ఈ ఘటన స్థానికంగా తీవ్ర కలకలం రేపింది.

వివరాల్లోకి వెళితే.. పెదలింగాలకు చెందిన బాలాజీ (10) తన నానమ్మ లక్ష్మి (70)తో కలిసి నిద్రిస్తున్న సమయంలో ఇంట్లోకి ప్రవేశించిన దుండగులు వారిద్దరిపై సిమెంట్ రాళ్లతో విచక్షణారహితంగా దాడి చేశారు. ఈ దాడిలో బాలాజీ అక్కడికక్కడే ప్రాణాలు కోల్పోయాడు. తీవ్ర గాయాలతో అపస్మారక స్థితిలోకి వెళ్లిన లక్ష్మిని స్థానికులు హుటాహుటిన విజయవాడలోని ఓ ఆస్పత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు వైద్యులు తెలిపారు.

సమాచారం అందుకున్న నందివాడ పోలీసులు వెంటనే ఘటనా స్థలానికి చేరుకుని పరిశీలించారు. సిమెంట్ రాళ్లతో తలపై బలంగా కొట్టడం వల్లే బాలుడు మరణించినట్లు ప్రాథమికంగా నిర్ధారించారు. ఈ దారుణానికి పాల్పడటానికి గల కారణాలు ఇంకా తెలియరాలేదు. పోలీసులు కేసు నమోదు చేసి, దుండగుల కోసం గాలింపు చర్యలు చేపట్టారు.